Навигация

Серіктестер

Жаңалықтар

«ДАЛА ДАНАЛЫҒЫНЫҢ» ТҰСАУЫ КЕСІЛДІ

Санат: Жаңалықтар
Уақыты: 07.06.2019
Оқылды: 162 Печать страницы
«ДАЛА ДАНАЛЫҒЫНЫҢ» ТҰСАУЫ КЕСІЛДІ
 

            Бүгін  Тіл сарайында Серік Үмбетовтың «Дала даналығы» кітабының тұсаукесер рәсімі болып өтті. Игі шараға қоғам қайраткерлері, зиялы қауым өкілдері, бұқаралық ақпарат құралдарының өкілдері қатысты. Салтанатты жиынды жүргізген  белгілі журналист, облыстық «Жетісу» телеарнасының директоры Бейсен Құранбек: «Дала даналығын» парақтап отырып, шын мәнінде қазақ халқының  далалық, даналық табиғаты, аталар жолы, ағалар арнасы бар екенін байқауға болады. Осы кітапта кездескен «Кісі күбірін тау естейді, тау күбірін тәңір естейді» – деген көнеден қалған көсем ой кім-кімді болса да бей-жай қалдыра қоймайтыны анық. Бұл кітап мемлекет пен қоғамға, адамдық пен тазалыққа, әділдік пен шынайылыққа  адал қызмет етіп келе жатқан жанның  күбірі, жүрек сөзі, сана биігінен қорытылған сан  қырлы ойларының күбірі,  ар алдында дұға қылған кісіліктің күбірі десек болады. Жазушы бұл кітапта пафоссыз, даңғазасыз, таза қоңыр қазақы қалыппен ой айтады. Оқырманмен  осылайша сырласады.  Сол кісілік күбірін Жетісу өзендері, Жетісу таулары,  ағамыздың туған өлкесі, кіндік қаны тамған жұрты естісің  деген мақсатта Жетісудың төріне әкеліп,  таныстырып отырмыз – деді.  Қазақ тәй-тәй басқан сәбидің де жолы ашық, ғұмыры ұзақ болсың деп  ырымдап тұсауын кеседі. Осы жақсы дәстүрді жаңадан жарық көрген кітаптарға да пайдаланып жүрміз. Олай болса, алдымен тусаукесер рәсімін өткізсек – деп, ортаға қос ақсақал шақырылып,  Аманғазы Шегіров пен Наурызбай Қылышбаев сиясы кеппеген су жаңа кітаптың тұсауын кесті.

           Серік Әбікенұлының соңғы жылдары Елбасы туралы, қилы қоғам мен ойлы адам туралы ой-пікірлері мен мақала, сұхбаттары жинақталып берілген, эсселері топастырылған кітапқа алғысөз жазған белгілі қаламгер, көркемсөздің хас шебері Асқар Алтай бұл  шараға арнайы келді.

    «Туған жерім Алтай болса да Жетісу жері мен үшін аса қымбат, аса қадірлі  – деп бастады сөзін ол. «Жетісу – алты Алаштың туын көтерген, Керей мен Жәнібекті  хан сайлаған,  қазақ хандығының Ақ ордасын тіккен қасиетті өлке. Осы жерде білім алып,  алғашқы қызметімді бастадым. Мені адам қылып тәрбиелеген, азамат қылып қанат қақтырған Жетісу жері. Сондықтан да, Жетісу жері мен азаматтарына қарызбын  –  деп, Алтайда туып, алты Алаштың ардақтысына  айналған жазушы жүрегінен орын алған, өмірінде жазушы болып, азамат болып қалыптасуына еңбек сіңірген  қасиетті  мекен туралы терең толқынысты ойын жеткізді. Сондай-ақ, облыстық  «Жетісу» газетінің бас редакторы Әміре Әрін: Бұл кітаптағы Серік Әбікенұлының кез-келген сөзін, кез-келген тұжырымын қанатты сөз  ретінде пайдалануға болады. Мәселен,  «Сынақтан өткен кезде бақ пен береке өзі келеді», «Қарлығаштың қанатымен жеткен  жақсы сөз – біздің түп негізіміз» деген кітап сөздерінен мысал келтіріп, «қазақ руханиятына қажетті бұлақтардың көзін қайталай ашқан секілді» – деп баға берді.

Ал, белгілі  баспагер-журналист Ырым Кененбай Серік Үмбетовтың облыс басшысы болған кезде газет-журналдарға ерекше ықылас білдіріп, таралымына қолдау көрсетіп,  газеттің әрбір нөмірін қалт жібермей оқып, бар нәрседен хабардар болып отыратын көзі қарақты басшы болғандығын тілге тиек етті.  «Ардагерлер ұйымы» қоғамдық бірлестігі Алматы облыстық филиалының төрағасы Ермек Келемсейіт «Секең ел арасында жүргенде елдің ішінде  ата-бабадан келе жатқан  жақсы сөздерді жазып, даналық ойларды түртіп алып,  насихаттап өміріне пайдаланып жүретін болған» - деп Серік Әбікенұлының  жаңа қырын ашып көрсетті.

Сондай-ақ, бұл шараға ақжарма тілектерін жеткізу үшін Жамбыл ауданынан Серік Әбікенұлының жерлестері арнайы  келді.

 Дина Нұрғалиева аналық, әпкелік ақ тілегін жеткізсе, «Кәсіпкер» журналының бас директоры Гүлжиян Сүлейменова кітап авторының адамдық, ағалық қамқорлғы жайлы айтты.

Осылайша қалың оқырманға жол тартқан «Дала даналығын»  жетісулықтар жылы лебізбен  қуана қарсы алды.

Біз кітапты парақтап отырып, белгілі журналист Нүсіпбай Әбдірахымның «Тілге ескерткіш орнатқан тұңғыш адам» деп аталатын мақаласын  көрдік. Бұл мақала Серік Әбікенұлы жайлы. Онда:

            Тіл сарайы республикамызда ғана емес, әлемнің ешбір елінде кездеспейтін өзгеше құрылыс десек, ешбір асырып айтқандық бола қоймайды. Әсем сарай әдебиет пен өнерді насихаттап, жас дарындарға қанат беретін өзіндік бір орталыққа айналған – деп жазылған. 

           Иә сол Тіл сарайында   бүгінде мемлекеттік тілдің қолданылу аясын кеңейтуге бағытталған шаралардан бөлек, аға буын өкілдері мен әдебиетке жаңа қадам басқан жастарға қолдау көрсетіліп, кітаптарының  тұсаулары кесілуде.  Солардың бірі – «Дала даналығы» кітабы.

Дизайн и разработка сайта от компании «Licon».
Создано на платформе Alison CMS © 2011-2019. Авторские права защищены законодательством Республики Казахстан.